Aller au contenu principal
Body

S TMAZIƔT

Inelmaden n KGB – FSB, d iqeddacen n udabu di Lezzayer

Di yal tamsalt, mi tqerneḍ tidyanin yiwet tama n tayeḍ, ad d-tban tafat amek i dduklent, zdint, mcuddent am teḥjurin n diminu, akken ad awint taḥemmalt srid ɣer temsalt-nni, i ferru neɣ i ḍellu.

Ayen akk iḍerrun si furar 2019, si tama n udabu, iteddu ɣer yiwen ubrid : akken ad yerẓ amussu n talwit (hirak/tanekra), i d-ilulen si Xerraṭa (Kherrata) deg wass n 16/02/2019 akked Lezzayer di 22/02, isddukel imelyunen n Izzayriyen n yal tama n tmurt akken ad ibeddel udabu ɣef uẓar. D tikkelt tamezwarut si 1962.    

Ilmend deg ad ldint tebbura, ad d-yefk ‘’système’’ udem, ad isbedd agraw n imussnawen izemren ad gen tigejda timezwura n tugdut (tamenḍawt tamaynut, asaka n talwit/période de transition…), ad d-yuɣal udabu deg ifassen n uɣref, adabu yefren abrid n tḥila akked udebbuz akken ad teqqim akken i tella. I netta, ulac abeddel nnig wayen ira netta ; adabu d netta.

Di tazwara, tamsalt teffeɣ abrid n tsertit, tekcem abrid n temsulta akked ṭṭrad deg ufus n ‘’les services’’.  

Mačči  s yidles n izerfan n umdan i ddan, s tikerkas n KGB – FSB i yasen-slemden (1) : sexreb annar akken yiwen ur ifehhem wayeḍ, yiwen ur ittamen wayeḍ, sekcem yal taḥilett, ssimes akken tufiḍ, ssekcem ɣer lḥebs d tirni, ewwet akka d wakka, taggara ad irwi wennar, ad ters talwit tallit si tigdi d ukukru...

Asaru n tedyanin iban am uzal :

  • Wten amek ad ssigden imdanen, mi ẓran tettimɣur tnekra, teffɣen-d d imelyunen di yal tamdint n tmurt, d argaz, d tameṭṭut, d tiwaculin akked yemɣaren, s yiwen wawal n tugdut, n izerfan : ‘’llan wid d-iheggan lbumbat akken ad nɣen wid iteddun deg ubrid’’… ‘’’atan ṭṭfen imdanen i d-iwwin ibeckiḍen akked...’’. Di TV-nsen, fkan-d udem n ‘’Abu Deḥduḥ’’ akken ad d-issefhem amek i d-ihegga lbumbat s yisem n MAK (sic!).

  • Wten amek ad bḍun tamurt, ad gedlen tikliwin di tama n utaram/lɣerb n tmurt (wehran, Tihert, Mestɣanem, …), akken ad wten tama s tayeḍ, zun tella Lezzayer ur nekkir deg umussu, tbedd tama n udabu.

  • Wten ad gen iɣisi gar Izzayriyen, ad kksen annay amaziɣ i yettrefrifen di yal tikli, di yal amkan n tmurt tama n wannay n Lezzayer, zdin d atmaten. D tadyant-nni i d-isbanen tikli n udabu anda yezmer ad yaweḍ deg ubrid n tkerkas.

  • Wten ad rẓen tanekra s tuṭṭfa n imeɣnasen ɣer lḥebs di yal amkan. I nitni, ulac tanekra n ugdud, d takemmict n yemdanen kan i izemren ad tt-snekren. Ma ṭṭfen-ten, cudden-ten, ad ters. Ur iffiɣ leḥsab-sen, acku simmal tettimɣur tnekra ɣas rennun imeḥbas.

  • Tukksa n tikliwin di ddra n Covid-19 yusan-yasen-d d afares akken leqḍen imeɣnasen i yettwassnen. Wten ad d-ɣeḍlen qawsas s teɣdemt usekkak, anda i ssezrin imeḥbas, ad asen-sbibben iseggasen n lḥebs akked imelyunen n lexṭeyya, tikkal nebla ma slan imastanen-nsen.

  • Deffir tsusmi n Covid-19, tikliwin rennunt simmal di tɣermin n tmurt n Leqbayel. ‘’Les services’’ ufan-d amek zemren ad sxerben, ad sfeclen tanekra : ad ssiɣen times i itmurt, ad sserɣen tuddar akked yemdanen. 

  • Ur qqimen di tmes-nni yenɣan nnig 200 yemdanen, i yesserven nnig 50 000 ha, wten ad tt-sbibben i MAK akked Rachad, zun d ikabaren irebraben, s ufus n tmura n Merruk akked Israël !  

  • Wten ad rẓen tiwizi-nni d-ikkren di yal tamdint n tmurt, d tallalt i yal asafar, i usexsi n times, i tikci n tgella i wid yenṭerren ; taggara at udabu fkan d asfel yiwen ilemẓi (Djamel Bensmaïl) i d-yusan si Lexmis Melyana ɣer Larbaâ At Iraten akken ad issexsi times, nɣan-t deg ukarrus n imsulta syen fkan ad t-sserven yemdanen zdat wallen n tmurt, akken ad inin : ‘’hat-en Leqbayel d lewḥuc, ur zmiren ad gen tugdut, adabu d nekkni kan i yas-izemren...’’. Tawaɣit-nsen ur tt-yumin yiwen. 

  • Taggara n tneggura, wwin-d zdat TV-nsen, zun wid yenɣan Djamel Bensmaïl, zun d imeɣnasen n MAK. Wid yenɣan ẓran-ten akk medden di yal video iteddun di internet, nitni wwin-d imdanen ur nelli deg umkan-nni, wid iwumi d-sselsen icettiḍen n wid yellan din. Wid yenɣa d iserdasen-nsen, sdergen-ten akkin.  D urar n sinima !

  • Mi wten akken zemren s tḥila n ‘’ucengu n ugensu / ennemi intérieur’’, snulfan-d acengu n berra, timura n Merruk akked Israël. D taḥilett yettwassnen : akked ad iddukel wegdud d yiwen, snulfu-d acengu i d-iwḍen ɣer zdat tebburt !’’, akken ad ttun tilufa n udabu. D taḥilett i yurar yakan Ben Bella di 1963 (la guerre des sables) akken ad ibḍu amussu n FFS ; issaweḍ yebḍa Muḥend Welḥaǧ akked Lḥusin At Ḥmed.

  • Anbac aneggaru i d-ufan, akken ad skecmen tawekka ugar, d tukksa n tutlayt tamaziɣt deg wahil n uɣerbaz, suffɣen-tt zun mačči d tutlayt. D anbac ad d-irnun wiyaḍ.  

  • Deffir tedyant n tifrarin n nunamber d-iteddun akken ad bedden igerwan n APC, ‘’les services’’ kecmen annar n ikabaren izemren ad ilin di temsizzelt n tifranin, zun d taseddart taneggarut n ‘’la normalisation’’, ad ttun yemdanen tiɣri n imelyunen i yessuturen si furar 2019 ad ikkes udabu wakali, ad d-ilal udabu amaynut ibedden ɣef tiɣri n Izzayriyen, s tafrent n tidett ur izdiɣ usekkak.

  • Azekka, ma teffeɣ fell-asen, akken ad sxerben ugar, ad rẓen amussu n furar, zemren ad d-snulfun timanit /autonomie n tmurt n Leqbayel s wudem  n tagduda n Tchetchénie (autonomie à la Techtchène), syen ad as-sbedden yiwen uselway am Ramzan Kadyrov (2), ad isserwet akken yufa, ad d-ters ‘’talwit n iẓekwan’’. 

Awal aneggaru, annar n tifrat n udabu di tmurt n Lezzayer mačči gar ifassen n iserdasen n DGSI, DRS, neɣ ismawen nniḍen. Akken llan d inelmaden n KGB, n FSB akked war isem, urar-nsen deg unnar n tɣirdemiwin, di tkerkas deg ur yelli uzref ur illi wemdan aɣerman/citoyen. Tamurt n Lezzayer tessaram ‘’transfert de technologies’’ yelhan i tgemmi n tmurt  mačči d tamussni taberkant n KGB-FSB.

Annar n tifrat akken ad d-yuɣal udabu gar ifassen n Izzayriyen d win n tsertit, n talwit, mačči d win n tḥila akked tyitwin n usexreb (opérations de diversion) am userɣi n tmurt, ṭtrad akked Merruk, neɣ tilufa nniḍen ad d-innulfun azekka.

A.U L.

Timerna / Notes :

1) FSB est un service de renseignement de la Fédération de Russie, chargé des affaires de sécurité intérieure. Le FSB est le principal successeur du KGB soviétique, dissous en novembre 1991 après le putsch de Moscou. Le siège du FSB est situé à la Loubianka, à Moscou. Les officiers sont formés à l'Académie du FSB à Moscou.

2) Ramzan Kadyrov, président de la république autonome Tchétchène depuis 2007, membre de la Fédération de Russie. Il est l’homme de main de Poutine (nommé par Poutine à la présidence).

Auteur
Aumer U Lamara, écrivain