Aller au contenu principal
Body

S TMAZIƔT

"Madame Maya" présidente !

Mačči d awal iwumi nesla ass-a, d win izemren ad d-yas azekka.

D ayen ad d-yasen azekka deg ubexlaluḍ ittnernin yal ass di teɣdemt n tmurt-nnaɣ.

Taɣdemt n Zeghmati neɣ n wayeḍ tedwel d ’’axxam bu-snat tebbura’’, yiwet tebburt tessekcam ilmeẓyen n tmurt ɣer leḥbas ɣef tikta-nsen akked tayri n tmurt, yiwet tebburt tessuffuɣ-d imukar akked wid illan yakan deg udabu, teskar yal taḥilett akken ad rnun ad ḥekmen ugar… deg wayla-nsen.

Nnan ‘’ISIS  yessimlil nnig temlel’’(1), am akken illa deg udellel. S lberhan-nsen d laâr-nsen, azekka ad d-suffɣen Mme. Maya si lḥebs (ma din i tella s tidett !), ad gen adellel di ENTV : ‘’Madame Maya Présidente !’’, ad wten s izerfan n tmeṭṭut, neɣ s yal taḥilett nniḍen.

Wid iṭṭfen adabu ass-a kecmen di tegnitt-nni n ‘’ayen ufiɣ ad wteɣ yis’’. Maca, d iziɣer n taggara-nsen neɣ d yir taggara i deg tella tmurt ass-a, tegumma ad d-teffeɣ ?

Di 1985, akken ad rẓen taseqqamut n izerfan n umdan (Ligue Algérienne de Défense des Droits de l’Homme) i d-ilulen di tmurt tqubel adabu, skecmen ɣer lḥebs n Berwagiya akked win n Taẓult agraw n tseqqamut (comité directeur) akked d imeɣnasen nniḍen acḥal d agguren d iseggasen, gar-asen Ali Ali Yahia, Saïd Sadi, Saïd Doumane, Ferhat Mehenni, Noureddine Ait Hamouda, Amokrane. Ait Larbi, Arezki Ait Larbi, Hachemi. Nait Djoudi, Rachid Bellil, Arezki Abbout, atg.

Adabu ur iqqim di tɣennant-is akked ucekkal akken ad yerẓ amussu d-ilulen, iwwet s yal tikerkas, icban asfuǧǧeɣ n uneɣlaf-nni : « l’Algérie toute entière est une ligue des droits de l’Homme ! », syin snulfan-d tiseqquma usekkak (des fausses ligues des droits de l’homme, observatoire des droits de l’Homme, etc...). Laâr-nsen iban ur iffir, d timerna i yerna.

Di 1989, adabu n Chadli yefka afus, snulfan-d akabar n FIS (Front Islamique du Salut) d amezrag n taârabt-tinneslemt i yessawḍen ɣer nnger s wudem n GIA, GSPC, AQMI, … i yenɣan azal n 300000 Izzayriyen. Ar ass-a, aṭan-is ur ifri.

Bouteflika zdat unezzarfu di ddra n "HAUTE TRAHISON".

Tadyant n ‘’ifeggagen n wureɣ’’ n Ouyahia, i d-innulfan ussan-a, tefka-d tasarut i wayen iḍerrun si nnig 20 iseggasen aya, amek tenza tmurt i yigelliden n Limarat, Qatar akked wiyaḍ. Igelliden kecmen tadamsa n tmurt, kecmen akal n tmurt, snegren tiɣzalin n tmurt, uɣen akk wid illan deg udabu.

Ma yella Ouyahia uɣen-t s 60 ifeggagen n wureɣ neɣ ugar, s wacḥal i yuɣen win illan nnig-s, Abdelaziz Bouteflika akked wiyad ?

Wid ittberriḥen ass-a s ‘’Lezzayer tamaynut’’, ɣas ur ten-isbedd yiwen, d tamara fell-asen ad bdun ad kksen tabarda i rran i Lezzayer igelliden n Abou Dhabi, Ryad akked Doha, ad d-awin Abdelaziz Bouteflika zdat teɣdemt. Ad d-ikfel wayen illan, ad d-ibin ɣer tafat.

Neẓra ad d-iffeɣ wayen ɣef ur nebni, acku mačči yiwen laâr i yeffren.

D asirem kan. Neẓra am Bouteflika, am wid illan ass-a deg udabu ttwaqqnen di ‘’la corruption’’  tameqqrant n igelliden , am wid ilsan akaskiḍ, am wid ur nelsi. Abrid-nsen injer ɣer Tazult. Maca, « siweḍ akeddab ɣer tebburt ».

Abrid n tlalit n Lezzayer tamaynut n tidett  iban ur iffir, d tukksa n systeme wakali. Ulac abrid nniḍen. 

Aumer U Lamara 

Timerna / Notes.

1) Ussan-a taɣdemt n Lezzayer teqḍa ɣef ‘’Madame Maya’’ s 12 iseggasen n lḥebs. Am unezzarfu (juge), am ɣerraq (procureur), suffɣen-d deg wawal-nsen imelyunen, ixxamen, igerrujen i yufan din, maca awal ur t-id-nnin ɣef tsebbiwt tamezwarut n tidett : d ayen gan wid illan deg udabu, Abdelaziz Bouteflika, Saïd d wiyaḍ i yessexdamen Mme. Maya akked tiyaḍ di yir tafellaḥt (entremetteuses), acḥal iseggasen aya, selqadent-d tilmeẓyin n Lezzayer i nitni akked imeddukal-nsen, rran tizeɣwa n tmurt (résidences d’Etat) d tizeɣwa n laâr, d lupanar.

Taɣdemt n Lezzayer terra taduli ad teffer laâr ameqqran, acku llan akk deg-s.

 (win ur nessin awal ‘’lupanar’’,  ad t-yaf deg umawal, neɣ di Google).

2) Adellel (Publicité) : ittwassen yiwen udellel di Fransa : ‘’OMO lave plus blanc !’’.

Auteur
Aumer U Lamara, écrivain